ممتن لفنجان قهوه
خير يا انسه في حاجه
هو انا شكلي وحش
نعم
بسألك بجد شكلي وحش رفيعه زياده عن اللزوم
شعري شكله مخيف
لأ شكلك حلو جدا
وشعري
لونه جميل
طب ليه محدش بيقولي كدا
محدش بيقولك ايه
محدش بيقولي اني شكلي حلو وشعري لونه جميل
هو انا صباره محدش بيحبني محدش مهتم يديني ثقه في نفسي
لا لا مش كدا ممكن مبيلاحظوش
طيب متشكرة لزوقك ممكن تعزمني علي قهوه
ايه مالك تنحت ليه كدا في كافيه حلو قريب من هنا اعزمني فيه بص انا ممكن انا اللي احاسب بس انت اللي تعزمني
انا مش فاهم انتي بتقولي ايه بس انا حقيقي ورايا شغل ومتأخر عليه ف ممكن امشي
بتشتغل ليه
بشتغل في شركة
لا مبقولش بتشتغل ايه بقولك بتشتغل ليه
يعني ليه كل يوم تصحي بدري وتلبس لبس شيك زي اللي لابسه دلوقتي دا وتروح شغلك
علشان الفلوس متعرفش ان كلنا هنموت ومش هنعمل حاجه بالفلوس ولا ايه
ايه قنبله التفائل اللي فتحت في وشي دي
ششش انا اقتنعت خلاص يلا اتفضل قدامي علي الكافيه
يابنتي انتي ملبوسه
لا ما انا مش هشرب قهوه لوحدي
لو سمحتي سيبيني من فضلك انا متأخر
اتفضل
اتفضل ايه
روح شغلك اللي متأخر عليه
الاهتمام مبيطلبش يا حضرت بكرا لما تكبر وتعجز هتندم علي كوبايه القهوه اللي فاتتك دي
بصلي شويه وبعدين مشي روحت الكافيه وقعدت لوحدي كالعادة بس مطلبتش قهوه يمكن لأني قولتله مش هشرب قهوه لوحدي النهاردة مش عارفه
طلبت نسكافية وطلعت روايه من شنطتي وفضلت اقرأ فيها
فجأة لقيت حد بيقعد علي الكرسي اللي قدامي لما بصيت لقيته هو نفس الشخص اللي وقفت اتكلمت معاه في الشارع
اتأخرت
ايه الي جابك مخوفتش علي شغلك
بصراحه استخسرت فيهم الطقم الشيك اللي انا لابسه ف قولت اجي اقعد بيه فالكافيه
اه جاي تشقط يعني البنت اللي وراك ناحيه اليمين دي قمر جدا
انا مش كدا علفكره
امال جاي ليه
خوفت لما اكبر واعجز اندم علي كوبايه القهوه دي لو فاتتني
تقريبا انا نسيت اقولك حاجه مهمه
ايه
القهوه بتاعتهم هنا طعمها وحش جدا بكلمك بأمانه يعني
مش انتي قولتي ان القهوه بتاعتهم حلوه
اه ما انا ساعتها مكنتش بكلمك بأمانه
ضحك وبعدين قالي طيب اعزمك
انا بشرب نسكافيه دلوقتي اطلب حاجه ليك
نادي الجارسون وطلب نسكافية زيي مكنتش عارفه المفروض اقوله ايه هو كدا ممكن يكون فاهمني غلط
فاهم اني بنت مش كويسه
بالمناسبه انا اسمي غيث
مقولتليش بقا اسمك ايه
اسمي هدي
اسمك جميل اوي
هو انت فاهمني غلط
اصل ان بنت توقفك في الشارع وتسألك شكلها حلو ولا لأ وتقولك تعزمها علي قهوه اكيد هتتفهم غلط ف انت فهمتني غلط
لا انتي مش شكل بنت مش محترمه شكلك هبله
اه عندك حق انا فعلا هب ايه لا انا مش هبله
عبيطه طيب
اهو انت الي عبيط وستين عبيط انت جاي تعكرلي مزاجي
حد قالك تقوليلي اجي
مكنتش اعرف انك مستفز
كويس اديكي عرفتي
بتقرأي ايه
ملكش دعوه عموما انا اتأخرت ولازم امشي
مش هشوفك تاني
بكون موجودة هنا كل يوم
مشيت اتبسطت انه جه مع اني معرفهوش ولا حتي هو كان يعرفني ايه اللي يخلي واحد يغيب يوم من شغله علشان يقعد مع واحده هو ميعرفهاش
واضح اني مش هبله لوحدي
فضلت اروح الكافيه كل يوم زي عادتي بس مكنتش بلاقيه كنت بحس اني مضايقه مكنش بيوحشني
عدا 3 اسابيع مشوفتهوش فيهم وفقدت الامل انه يجي
قعدت وطلعت رواية وبدأت اقرأ
سمعت صوت الكرسي بيتشد ف عرفت انه جه
صالحني
اصالحك
اه مانت بقالك كتير مبتجيش وبفضل قاعدة لوحدي ودا شئ يستدعي انك تصالحني
ولو مصالحتكيش
هنادي علي الجارسون واقوله انك بتطفل عليا وقاعد علي نفس الترابيزه من غير موافقتي ف هيقولك تقعد علي ترابيزه تانيه ولو موافقتش هيضطر يقولك تمشي
طب مش تسأليني الاول مكنتش باجي ليه
اممم طيب مكنتش بتيجي ليه
كنت في تركيا
تركيا
اه سفريه تبع شغلي
الله ان شاء الله المره الجاية تاخدني معاك انا قررت خلاص
تيجي تعيشي حياتي بدالي تيجي والله
بتتريق
اصل دا مش كلام ناس عاقلين يعني
قصدك اني مجنونه
انا مقولتش كدا
اه بس اكيد قولت كدا في سرك
سري وانا حر فيه
لا سرك ميجيبش سيرتي علي لسانه احسن والله ا اا اقطعه واخليك ماشي من غير سر كدا والناس تقول اللي من غير سر راح اللي من غير سر جه
ما علينا شكلك حلو النهاردة
انا ديما شكلي حلو
لا هتتغري شويه كمان هقوم امشي
بجد
اه وشعرك شكله جميل
اه منا حطاله زيت غالي فاكرني بستخدم حاجات مش غالية لا
