بنت الباشا الشغاله.... لمشيره محمد

مرعوش حصل إيه؟ أنتي كويسة؟
ليلى وهي بتلم القزاز بسرعة أنا آسفة يا باشا.. غصب عني، أنا بس بخاف من الرعد والبرق من صغري.
كامل قلبه قبضه.. نادية كانت بتترعب من البرق بنفس الطريقة. قام من مكتبه وقرب منها، لقى السلسلة اللي في رقبتها بانت أكتر تحت ضوء الكشاف.. السلسلة الفضة اللي كان فيها حرف ن و ك.
كامل بصوت متهدج السلسلة دي.. جبتيها منين يا ليلى؟
ليلى بصت له باستغراب وحطت إيدها على السلسلة دي حاجة أمي نادية سابتهالي قبل ما تموت.. قالتلي دي أغلى حاجة طلعت بيها من الدنيا، وإنها من الشخص الوحيد اللي قلبها اختاره.
كامل حس إن الأرض بتلف بيه، سند على المكتب عشان ميقعش.
كامل وأمك.. مقالتلكيش الشخص ده فين؟
ليلى عينيها لمعت بدموع وقوة في نفس الوقت قالتلي إنه مات.. مات بالنسبة لها من اليوم اللي سابها فيه وهي شايلة فيّ. قالتلي يا بنتي اللي يبيعنا مرة، نعتبره ميت ونعيش حياتنا.
الكلمة نزلت على كامل كأنها خنجر.
كامل لو طلع عايش يا ليلى؟ لو طلع قدامك دلوقتي؟
ليلى ضحكت ضحكة وجع لو قدامي دلوقتي؟ هقوله شكراً.. شكراً إنك علمتني إن القسوة ممكن تيجي من أقرب الناس. بس حضرتك بتسأل الأسئلة دي ليه يا سعادة الباشا؟
كامل سكت.. الصمت كان تقيل لدرجة إنهم سامعين صوت دقات قلب بعض. وفجأة، كامل قرر يرمي الورق كله.
كامل عشان السلسلة دي أنا اللي جايبها يا ليلى.. وعشان حرف ال ك ده يبقى كامل.. وعشان نادية مكنتش مجرد جارة لأم سعد.. نادية كانت...
ليلى قاطعته وصوتها بقى عالي كانت إيه؟ انطق! كانت الست اللي رميتها عشان تطلع السلم وتعمل كامل وشركاه للمقاولات؟
كامل اتصدم.. ليلى كانت عارفة!
ليلى بانهيار أنت فاكر إني جيت هنا بالصدفة؟ أم سعد حكت لي كل حاجة من سنين.. أنا جيت هنا عشان أشوفك، عشان أعرف الراجل اللي بسببه أمي عاشت خدامة في بيوت الناس عشان تربيني، كان يستاهل كل الوجع ده ولا لأ.
كامل بيحاول يمسك إيدها يا ليلى اسمعيني.. أنا كنت صغير، كنت خايف..
ليلى زقت إيده خفت من حتة لحم منك؟ خفت من البنت اللي سابتلك الدنيا وجت تخدم في بيتك عشان بس تحس بيك؟ أنا مش عايزة منك فلوس، ولا عايزة أكون بنت الباشا.. أنا جيت عشان أبص في عينك وأقولك إنك خسرت كتير قوي يا أستاذ كامل.. خسرت بنت كانت ممكن تحبك أكتر من أي نجاح وصلت له.
ليلى سابته وخرجت في المطر.. وكامل فضل واقف في نص مكتبه الفخم، اللي بقى في اللحظة دي أضيق من سجن، وهو بيصرخ باسمها وسط الرعد.
ليلى خرجت والمطر كان بيغسل شوارع القاهرة، وكأن السما بتبكي مع شريط ذكريات كامل اللي اتقطع فجأة. كامل مقدرش يسيبها تمشي المرة دي.. مش بعد 30 سنة.
جرى وراها وهو بينهج، بدلة ال هوانم والبرستيج والمنصب كلهم دابوا تحت المطر.
كامل بيزعق بوجع يا ليلى! استني يا بنتي.. متمشيش زي ما أنا مشيت.. ليلى!
ليلى وقفت في نص الشارع، المطر مغرقها، لفت له ووشها كان عبارة عن ميكس من الغضب والكسرة.
ليلى بنتك؟ دلوقتي بقيت بنتك؟ لما كبرت وبقى عندك فيلا وملايين؟ طب والبنت اللي كانت بتعيط وهي بتشوف العيال ماسكين إيد أهاليهم في العيد؟ والبنت اللي كانت بتشوف أمها بتتهان في الشغل عشان تجيب لها تمن الكراسات؟ كنت فين يا بابا؟
كامل قرب منها وصوته مرعوش كنت أناني.. كنت غبي.. الدنيا عمتني يا ليلى. أنا جنيت شقا عمري كله ولقيت نفسي في الآخر واقف لوحدي في بيت كبير مفيهوش روح. السلسلة دي وشاور على رقبتها.. السلسلة دي فضلت في أحلامي كل ليلة. أنا مكنتش بهرب منك أنتي.. أنا كنت بهرب من ذنبي.
ليلى بصت له بقسوة والذنب ده مبيتصلحش بكلمتين في المطر يا سعادة الباشا. أنا اشتغلت عندك خدامة أسبوع.. شوفتك وأنت بتأمر وتنهي، شوفت القوة اللي في عينك.. ومكنتش متخيلة إن ورا القوة دي راجل مهزوز خاف من عيلة صغيرة.
كامل نزل على ركبه في الطين والمطر.. مشهد لو حد من موظفين شركته شافه مكنش هيصدق إن ده كامل بيه.
كامل أنا مش هطلب منك تسامحيني.. أنا هطلب منك فرصة واحدة. مش عشان أكون أب.. أنا عارف إني مستحقهاش. بس عشان أكون إنسان. سيبيني أصلح لو جزء صغير من اللي انكسر. ليلى.. أنا بيتي مفتوح لك، مش كشغالة.. كصاحبة مكان.
ليلى مسحت دموعها مع المطر البيت ده أنا مش عايزة أدخله تاني.. ريحته فكرتني بوجع أمي وهي بتحكيلي عنك. لو عايزني أسامحك بجد.. وريني كامل اللي نادية أحبته، مش كامل الباشا اللي الناس بتخاف منه.
سابته ومشيت، بس المرة دي مكنتش بتجري.. كانت بتمشي ببطء، وكأن حمل تقيل انزاح من على كتافها. كامل فضل قاعد في مكانه، المطر هدي شوية، بس النار اللي جوه صدره كانت لسه والعة.
بعد شهر..
أم سعد دخلت مكتب كامل، لقته
قاعد بيقرأ في مصحف، وشكله اتغير.. ملامحه بقت أهدى، والشراسة اللي في عينه اختفت.
أم سعد يا سعادة الباشا.. فيه واحدة برا عايزة تقابلك.
كامل قلبه دق ليلى؟
أم سعد بابتسامة بتقول إنها جاية تقدم على وظيفة بنت.. بس بشرط، إنها هي اللي تحط القوانين في البيت ده.
كامل قام وقف، رتب لبسه، وخد نفس طويل. ولأول مرة من 30 سنة، ابتسم بجد.. ابتسامة طالعة من القلب.
كامل قوليلها.. البيت والباشا والشركة وكل اللي وراه قدامها.. وهي تأمر.
فتحت ليلى الباب، ودخلت وهي لابسة فستان بسيط، وفي رقبتها نفس السلسلة الفضة.. بصت له بنظرة فيها عتاب بس فيها بداية. كامل مد إيده، وليلى المرة دي محطتش إيدها على ركبها زي الشغالين.. ليلى حطت إيدها في إيده.
ليلى هنتعب قوي يا بابا عشان نبدأ من جديد.
كامل أنا مستعد أتعب العمر كله.. بس متسبيش إيدي تاني.
تمت...
روايات_مشيره_محمد