كشف المستور بقلم مشيرة محمد

بما إنك قررتي تتكلمي عن نظافتي قدام ابني، يبقى خلينا نحكي الحكاية كلها يا داليا.
الابتسامة اختفت من على وشها كأن حد مسحها بأسفنجة، وعينيها تحولت لشيء قلقان ومرتبك. كريم رفع عينه وبصلي باستغراب، مش فاهم الهدوء الثقيل اللي حل على الأوضة فجأة، ولا النبرة الصارمة اللي تملكني.
حكاية إيه يا ماما؟ كريم سأل وهو بيحط المعلقة من إيده، عينه بتتنقل بيني وبين مراته في إيه حصل وأنا مش عارفه؟
داليا تحمحمت، ومسكت فوطة السفرة وحطتها على ركبتها باضطراب حاول تداريه بضحكة مكتومة
حكاية إيه بس يا ماما؟ أنا بتكلم عادي، نصيحة بين الأم وبنتها.. هو الموضوع يزعل للدرجادي؟
نصيحة؟ ابتسمت ابتسامة خفيفة، ونزلت نظرتي لإيدي المضمومة على الطاولة النصيحة قدام الناس فضيحة يا داليا، ده أولاً. وثانياً.. اللي بيخاف على صحة ونظافة غيره، الأولى بيه يتأكد إن تصرفاته هو مش بتهدد صحة البيت كله.
داليا و شها اصفر، وحسيت إيدها بتترعش وهي بتمسك كوباية المية.
يا أمي وضحي، في إيه بالضبط؟ كريم قالها بقلة صبر، وبدأ يبان عليه التوتر.
تنهدت وبصيت لابني، الابن اللي ربيته بعد وفاة أبوه محمود، شقيت عشان أربيه وأوصله لإنه يبقى راجل، وكنت دايماً بستحمل أي حاجة عشان ما أكدرش صفو حياته. بس لما يوصل الأمر لإنه يتداس على كرامتي في بيتي، ولما الموضوع يمس حاجة تمس بيتي وأماننا، يبقى السكوت جريمة.
من شهرين يا كريم.. بدأت كلامي بصوت واطي وموزون وأنا متعودة أصحى بدري، الساعة خمسة الصبح، عشان أقرأ وردي وأشرب الشاي في البلكونة قبل ما حد يصحى. ومن شهر تقريباً، لمحت داليا بتصحى في الوقت ده وتتسلل للمطبخ، وبعدها تطلع على بلكونة الصالة.
داليا قامت من على الكرسي بسرعة وقالت بصوت مروح
إيه الكلام ده؟ إنتِ بتراقبيني في بيتك يا ماما؟ وبعدين أنا بسهر ساعات وبجوع، هو الأكل والفرندة بقوا بذنوب؟
قعدي يا داليا! كريم صرخ بصوت هز الأوضة، كانت أول مرة أسمعه يكلمها بالشكل ده قعدي واسمعي!
داليا قعدت وهي بتبصلي بغل، وعينيها بتطق شرار.
كملت كلامي من غير ما أهتز
ما قلتش الأكل بذنوب. بس اللطيف إن داليا ما كانتش بتدخل تجيب أكل. داليا كانت بتدخل المطبخ، تفتح شنطتها الهاندباك اللي بتسيبها على الرف فوق، وتطلع منها أكياس بلاستيك سوداء صغيرة. والأغرب.. إنها كانت بتطلع على بلكونة الصالة، وتفتح سور البلكونة، وتبدأ تطلع أظرف وأكياس صغيرة وتسلمها لحد واقف تحت في الشارع!
السكون طوق الأوضة. كريم بص لمراته بذعر وذهول
إيه؟ تسلم مين؟ تحت في الشارع الساعة خمسة الصبح؟!
داليا وشها جاب ألوان، وبدأت تتلعثم
ده.. ده كذب! إيه الخرافات دي؟! إنتِ بتتبلي عليا عشان قلتلك استحمي؟! يا كريم إنت هتصدق الكلام الفارغ ده؟ أمك كبرت وتخرفت شكلها!
أنا عقلي يوزن بلد يا بنت الناس! ردت بنبرة حازمة هزت الكيان وقبل ما تقولي تخرفت.. افتكري إنك نسيتي الأسبوع اللي فات تقفلي الشنطة دي كويس وهي على الرف. لما جيت أنظف المطبخ واشيل الكراكيب، الشنطة وقعت واطردت على الأرض.. وشفت اللي فيها.
كريم وقف، وشه بقى شاحب زي الميتين.
شفتي إيه يا أمي؟ انطقي الله يخليكي!
شفت عينات أدوية، ومستحضرات تجميل، وأدوات طبية معقمة من العيادة الخاصة اللي شغالة فيها داليا! بصيت لداليا بثبات العيادة اللي شغالة فيها سكرتيرة ومسؤولة مخزن.. داليا بتسرق عينات العينات الغالية، وأدوية التجميل المستوردة من مخزن العيادة، وبتبيعها لحسابها لواحد بيجيلها تحت البيت كل كام يوم الفجر ياخد الشحنة ويديلها الفلوس كاش!
داليا صرخت
كدابة! دي أدوية خاصة بيا! دي أختي بتستعملها!
أختك بتستعمل أربعمائة أمبول بوتوكس وفيلر مسروقين بختم المستشفى الخاص؟! صرخت فيها أنا المرة دي، وقمت وقفت أختك بتستعمل العينات المسعرة الممنوع تداولها خارج العيادات إلا بروشتة معتمدة؟ أنا ما تكلمتش طوال الشهور اللي فاتت عشان ما أخربش بيتك يا كريم. قلت يمكن محتاجة، يمكن بتجمع فلوس لمقدم الشقة اللي بتقولوا عليه.. لكن إنها تستغل طيبي وسكوتي، وتسرق العيادة اللي آمنتها على أكل عيشها، وتدنس بيتي بصفقات مشبوهة بالفجر، وجاية دلوقتي تنظر عليا في النظافة وتصغرني قدامك عشان تداري على قرفها ونقصها؟.. لأ لحد هنا وألف لأ!
كريم بص لداليا كأنه بيشوفها لأول مرة. الصدمة كانت أكبر من قدرته على الاستيعاب.
داليا.. الكلام ده صح؟
داليا بدأت تعيط بهستيريا، عياط تمثيل وتماسيح
كريم أرجوك ما تصدقهاش! أمك بتكرهني من أول يوم دخلت فيه البيت! هي شايفتني عالة! هي بتخترع القصة دي عشان تطردني!
بتخترع؟ قلتها بهدوء، ومديت إيدي في جيب جلابيتي، وطلعت موبايلي القديم أنا صحيح ست كبيرة يا داليا.. بس مش عبيطة. الموبايل ده فيه كاميرا، واليوم اللي شفتك بياعة فيه بالفجر، وقفت ورا ستارة البلكونة وصورتك بالفيديو وإنتِ بتنزلي الكيس بالسبت للراجل وهو بيديكي الفلوس. والصورة واضحة وزي الفل.. تحبي أوري الفيديو لكريم؟ ولا نبعته لصاحب العيادة الدكتور صفوت اللي بيعتبرك زيه زي بنته؟
داليا انقطعت أنفاسها. الصدمة شلت لسانها تماماً، وما قدرتش تنطق كلمة واحدة. سقوط الأقنعة دايماً بيبقى له صوت مرعب.
كريم مشي ببطء ناحيتي، مسك الموبايل بإيد بتترعش، فتح الفيديو اللي كنت مجهزاه.. وشاف مراته وهي بتسلم السرقة في ظلام الفجر، وبتاخد رزمة فلوس تحطها