العريس

بهيئته الحقيقية عريض من فوق ورفيع من تحت وحاولت أتعايش معاه لمدة أربع سنين ومفيش علاج جايب نتيجة سواء كان علاج نفسي أو علاج روحاني ودايما لما أشوفه بتكون رجله مش ملامسه للأرض يادوب بينها وبين الأرض شبر أو أكتر.
بعدها بقى يأذي أي حد يزعلني في مرة حصل موقف معايا في المدرسة مع واحدة صاحبتي قالت إني قولت كلام على واحدة صاحبتنا وطبعا دا محصلش وافترت عليا وأصحابنا صدقوها وزعلت جدا وقتها من سوء الظن وفي آخر السنة البنت دي سقطت وفضلت تمتحن وتسقط لحد ما طلعوها من الكلية واكتفت بالشهادة الثانوية حتى أقرب الناس ليا كان بيأذيهم حصل موقف بيني وبين والدتي وزعلت منها جدا وفي نفس اليوم وهي بتنشر الغسيل في البلكونة حبل الغسيل لف حوالين صوابعها وكانت هتتقطع لولا ستر ربنا وصوابعها اتفتحت ونرفت دم كتير ورحنا المستشفى وبعدها فضلت أسبوعين نايمة في السرير لا عارفة تحرك صوابعها ولا حتى رجلها.
والمواقف اتكررت مع ناس كتير لحد ما قررت مزعلش من حد عشان ميتإذيش وأحس بالذنب بعدها وكنت بكتم زعلي على قد ما أقدر لحد ما والدي قرر يسيب الشقة وأخدنا شقة جديدة في مكان تاني وعدت أول سنة تمام لا بشوفه ولا أسمع صوته.
بدأ يظهرلي من تاني والأمور رجعت لطبيعتها وأكتر مع إني كنت بحافظ على الصلاة وورد يومي من القرآن ويمكن دول اللي خففوا عني شره.
كنت لما أدخل الحمام لأي سبب أحاول أمنع نفسي من المراية لأني لما ببص فيها كنت بشوفه واقف ورايا وبيبتسملي والحمد لله أن نظري ضعيف فمكنتش بشوفه كتير وإلا كنت اتجننت.
من شدة الخوف كنت بخلي ابن خالي الصغير ينام جمبي وكنت برضو بحس بوجوده معانا بس وجود ابن خالي كان بيطمني ولو قربته مني أو حطيت إيدي عليه كنت بسمعه يزعق في ودني بصوت عالي ويقولي لا مبحبش كدا ولو منفذتش كلامه وشيلت إيدي أحس بنار في ضهري وأضطر أشيلها.
أوقات لما أكون نازلة الكلية يقولي خليكي في البيت عشان لو نزلتي مش هترجعي في البداية كنت منزلش فعلا لكن بعدها بقيت أروح الكلية ومكانش بيعملي حاجة.
وفي يوم وأنا في الصيدلية جالي واحد قالي عايز برشام كيتولاك وبعد ما أخده بصلي وقالي مالك تعبانة ليه فيه حد معاكي 
فاجأني بالسؤال ولما شاف نظرة الصدمة في عيني قالي متخافيش أنا شوفت فيكي حاجه مش مظبوطة ولازم تروحي للشيخ الفلاني وقالي كمان حاجات كانت بتحصل معايا كأنه عايش معانا وبعدها مشي ولحد دلوقتي مشوفتش الراجل دا تاني.
لما خلصت شغل ورجعت البيت حكيت لبابا على اللي قالهولي الراجل دا وفعلا جابلي الشيخ لكن قبل ما ييجي حلمت ليلتها بحلم بشع.
حلمت إني واقفة مع الجن دا وكان لابس هدوم وسخة جدا بنطلون أبيض قديم وتيشرت مقطع وقدامنا واقف حصان وكل ما نيجي نركب يرفع رجليه ويبعد عننا وهو مرعوب من منظر الجن وفضلنا نحاول لحد ما جي واحد ماسك عصاية وقعد يضرب الجن دا على دماغه وهو يصرخ لحد ما أغمي عليا من بشاعة المشهد ولما صحيت لقيت ضوفر صباع رجلي الكبير متشال ومرمي تحت رجلي على المرتبة.
الشيخ جي وفضل يقرأ عليا واليوم دا تعبت واتشنجت واتبهدلت بمعنى الكلمة ومن بعدها الحمد لله محصليش حاجة تاني الكلام دا من أربع شهور ويارب الحال يستمر كما هو عليه.
قصة حقيقية 
انتهى.
لو خلصت قراءة اكتب تم 
ومتنساش تضغط متابعة عشان يوصلك كل جديد
جمال_ الحفني