كامله ندى أحمد
المحتويات
ماشي يا بابا اللي تشوفه.
وبعدها خرج من الأوضة.
تلت ثواني بالظبط ولقيت أحمد داخل الأوضة بيقولي
امال بابا كان عايزك في إيه
بصتله بطرف عيني وقولتله
وأنت مالك يا غتت.
لقيته مسكني من قفايا وهو بيقول
هتقولي كان بيقولك إيه ولا اعلقك في السقف مكان المروحة دي.
زقيت إيده وأنا بقول
خلاص هقول ابعد بقى.
ربع رجليه وقال
اشجيني.
جايبلي عريس.
اتكلم بضيق وقال
ومين ده بقى.
مش عارفه.
أنت رأيك إيه
مش عارفه هصلي استخارة واللي فيه الخير يقدمه ربنا.
لقيته ملس على شعري وهو بيقول
كبرتي يا ندى.
يا جماعة والله أنا كبيرة من زمان.
لقيته وقف على السرير ورفع إيديه وقال
عقبالي أنا كمان يا رب.
يا رب علشان أخد أوضتك.
نزل من على السرير وقال وهو خارج من الأوضة
ده بعينك أنا اللي هاخد أوضتك وبعدها افتح الأوضتين على بعض واعيش فيهم براحتي.
وبعدها قفل الباب وراه.
العشاء أذنت فخرجت اتوضيت وصلينا أنا وماما وبعدها دخلنا عملنا عشاء
وقعدنا كلنا اتعشينا وبعدين قعدنا مع بعض شوية بعدها كل واحد دخل أوضته علشان ينام.
صحيت تاني يوم على صوت المنبة وصوت الموبايل كان جاي من الصالة.
فخرجت طفيته ودخلت اتوضيت كان الفجر فاضل عليه خمس دقايق ويأذن فخبطت على بابا وماما وبعدين دخلت
اصحي الأستاذ غيبوبة فضلت اصحي فيه كتير وفي الأخر مرضيش يقوم.
قولت بس مفيش غير بابا يقوم بالمهمة دي.
فقولت لبابا يدخل يصحيه
وأول ما بابا دخله الأوضة وكان في أقل من دقيقة خارج من الأوضة..
دخل اتوضى وخرجوا هو وبابا للمسجد وأنا دخلت أصلي في أوضتي وماما كذلك.
صليت الفجر وقعدت اردد .
أستغفر الله أستغفر الله أستغفر الله.
اللهم أنت السلام ومنك السلام تباركت يا ذا الجلال والإكرام .
وبعدها قرأت آية الكرسي وسورة
لا إله إلا الله وحده لا شريك له
له الملك وله الحمد
وهو على كل شيء قدير
اللهم لا مانع لما أعطيت
ولا معطي لما منعت
ولا ينفع ذا الجد منك الجد.
وبعدين بدأت في قرآة وردي
وبعدها طلعت على السطح علشان أشوف الزرع بتاعي واسقيه.
شوية ونزلت كانت الساعة جت ٧ ونص.
دخلت جهزت الفطار علشان بابا وعمير ينزلوا شغلهم.
وقعدنا فطرنا وكل واحد راح شغله وأنا دخلت نمت.
صحيت على الساعة ١١ صليت الضحى
وماما مسكتني بقى نضفي فوق المراوح
نضفي تحت الركنه امسحي الحيطان.
يعني العريس هيسيب كل حاجه ويبص تحت الركنه علشان يطمن على مستقبله.
بجد مش فاهمه!
وبعد عدد ساعات طويلة من التنضيف والشيل والحط والنزول والطلوع.
أخيرا ماما سابتني على قبل المغرب بنص ساعة علشان اجهز.
وقفت قدام الدولاب بحيرة وأنا مش عارفه ألبس إيه
خرجت الدولاب كله وبعدين قعدت في نصهم و...
وعيطت بجد الحيرة دي وحشة أوي.
أحمد دخل عليا لقاني بعيط فسأل بخضة
مالك يا ندى في إيه
رفعت وشي ليه وأنا بقول
مش عارفه ألبس إيه.
جه قعد جمبي وطبطب على كتفي وقال
طيب وده سبب يخليكي تعيطي.
اتكلمت بعصبية وقولت
أه سبب يا أحمد وبعدين المشاعر لا تناقش.
طيب يا ستي قومي يلا وأنا هقولك تلبسي إيه.
سألته بلهفه
ألبس إيه
عندك دريس بني وطرحة تايجر هما الأتنين بيبقوا تحفة عليكي.
مسحت دموعي وأنا بسأله بشك
بجد
ضحك وهو بيقول
أه والله بجد.
المغرب أذن فهو خرج يصلي وأنا اتوضيت وصليت.
وبعدها لبست واستخدمت مرطب لوشي وشفايفي ولبست شراب أبيض ودخلت لماما المطبخ.
هي أول ما شافتني فضلت تقولي ما شاء الله على جمالك وفضلت تطبلي
شوية ولقينا الجرس ضرب فبابا وأحمد فتحوا الباب واستقبلوا الناس وأنا واقفة في المطبخ مع ماما وحاسه ان ثانية كمان وهيغمى عليا.
شوية ولقيت أحمد أخويا داخل عليا وما شاء الله ضحكته من الودن للودن.
فقال
أنا موافق على العريس ده يا جماعة.
ماما قالتله
أنت تعرفه أصل أبوك مرضيش يقولي هو مين.
لما تدخلوا دلوقتي هتعرفوا هو مين.
وبعدها بصلي وقال
يلا يا ندى.
فقولتله برعب
مش عايزة ادخل سربه يا أحمد.
اسرب إيه هو فار أهدي كده وكله هيبقى تمام.
ناولني كوباية مايه وبعدها قالي
اتنفسي براحة.
عملت كده وحسيت اني أهدى شوية فماما ناولتني صنية العصير.
فخرجت بيها وأحمد وماما خارجين ورايا.
وأول ما رفعت عيني...
أوبااا أخدت الصدمة أنا كده.
أنا من الخضة اتصنمت مكاني.
فأحمد حركني وهو بيقول
أنستونا وشرفتونا والله يا جماعة.
حطيت العصير وسلمت على طنط كريمة والدة الغتت وعمو محمدلفظا فقط وبعدين قعدت.
يا رب يطلع اللي في دماغي غلط يا رب.
شوية ولقيت بابا بيقول لعمو محمد
ما تيجي نخرج البلكونة أصل الجو هنا حر.
وراح أخده وخارج وماما قالت لطنط ما تيجي نعملهم قهوة.
روحت باصه لأحمد أملي الأخير والحمد لله فضل قاعد.
فعمير اتكلم وقال
ها يا أبو حميد مش نفسك تخش تدوق الجاتوه اللي أنا جايبه.
فأحمد ابتسمله بسماجه وقال
لا يا عموري مليش نفس دلوقتي.
وأنا قاعدة مبسوطة أن أحمد مش هيمشي.
أحمد.
لقينا بابا بينده على أحمد آه يا فرحة ما تمت.
أحمد قام وبعدين قال لعمير وهو معدي من جمبه
بص أنا واقف هنا اهه لو حسيت مجرد إحساس إنك دايقتها هاجيلك وبعدها هنتاقبل في المسامح كريم ماشي يا أباا.
عمير ضحك وبعدين قال
ماشي يا شبح.
أحمد
لو دايق قولي جزر هتلقيني في قفاه.
ضحكت وهزيت دماغي.
بعدها أحمد دخل البلكونة لبابا.
وأنا فضلت أتأمل في شرابي ما شاء الله طلع جميل أوي.
فقاطعني وهو بيقول
أزيك يا ندى.
ابتسمت برخامة وأنا بقول
الحمد لله وأنت عامل إيه
والله ضهري واجعني من الشغل وكمان الأسانسير عندكوا بايظ فركبي كمان بقت بتوجعني وعندي صداع من أخوكي.
بصتله بذهول وبعدها قولتله
طيب ما تقوم تموت وتريحنا.
بصلي وقال
وأهون عليك.
هو أنت ابن خالتي وأنا معرفش!
ابتسم وقال
طيب إيه رأيك نتكلم بجد خمس دقايق.
قولت بتفكير
امم ماشي.
اتعدل في قعدته وبعدها قال
أنا عمير عندي ٢٦ سنة بشتغل في تدريس الأطفال وساعات بقف مع بابا في السوبر ماركت.
بصتله وقولت
والصلاة إيه الدنيا
الحمد لله بحاول على قد ما اقدر أني اصلي كل الصلوات في المسجد
طيب وعلاقتك بالقرآن
الحمد لله ليا ورد يومي سواء كان قرآة أو سماع.
طيب هتتعامل مع ولادك ازاي لو حد مره غلط.
هفهمه غلطه بهدوء.
ولو مفهمش.
اتكلم بهدوء قال
مفيش حاجه اسمها مفهمش.
احنا لما نبقى متفقين من الأول أن الفعل ده غلط ومينفعش نعمله بس هو جه وعمله هيبقى في عقاب.
إيه نوع العقاب
يعني مثلا همنع عنه لعبه بيحبها أو هزودله حفظه من القرآن مثلا وده لأنه غلط.
قولت بفرحة بس خبيتها علشان ميتغرش الواد ده
اممم حلو.
طيب أنت منتظر إيه من البنت اللي هتتجوزها
يعني
يعني أنت عايز الطرف التاني يقدملك إيه في العلاقة
مستني المعاشرة الطيبة يعني تكون
مبتشتغلش مطيعة وحنونه هادية تحب أهلي وتعاملهم كويس
بتعرف تطبخ نظيفة مبتنكدش على الفاضي والمليان
متعاملنيش الند بالند أبدا أبدا أبدا لأن دي أكتر حاجه أي راجل بيكرها
من
كلام جميل.
طيب أنت إيه الدنيا
سألته
يعني أنت متعرفش عني حاجه
كل اللي اعرفه معلومات عامة يعني.
متابعة القراءة
