الكهف الاسود

في ليالي الشتاء المنحوسة و من بعد الغروب كنت قاعد في البلكونة بشرب كوباية قهوة في البلد في بيت جدي عثمان
في البلد هنا و من بعد المغرب تبتدي الرجل تخف خالص في المناطق و تستولى الكلاب على الشوارع بالكامل و العتمة بتبقى هي الشئ الوحيد المسيطر على المكان كنت بحب اوي الجو دا بفضل قاعد لحد ما اسمع أذان العشاء و اصلي و اكمل قاعدة في البلكونة في هدوء و سكينة و بتفرج على الأراضي الزراعية اللي قدامي و بفكر في القضايا اللي معايا
و في وسط الهدوء دا كنت حاطط سماعة في ودني بسمع أغاني للست أم كلثوم و لفت نظري الزرع اللي موجود في الأرض الزراعية اللي قدامي بدأ يتهز جامد على غير العادة في الأول كنت فاكر أن السبب هواء شديد لكن بعد ثواني شوفت كلب خرج من وسط الزرع بس الكلب دا خرج بظهره يعني كان بيرجع لورا عشان خايف من حاجة!!
فضل الكلب اللي مربوط في رقبته حبل لونه احمر باصص ناحية الزرع و ينبح في الا شيء ينبح على حاجة انا مش شايفها فضل على الوضع دا ثواني قليلة و من بعدها!!!
من بعدها خرجت ايد سودة سحبت الكلب!!

بدأت الأيد دي تشده بعنف و هو كان بيحاول معاها و بيحاول يهرب لكن فشل في اللحظة دي قمت من مكاني و شلت السماعة من ودني و فضلت متسمر مكاني مندهش من اللي شوفته مفيش في أيدي حاجة اعملها!!
فضل الكلب ينبح لحد ما جسمه كله اتسحب داخل الزرع و اختفى جسمه و اختفى النباح بتاعه من الصدمة انا فضلت مكاني مش عارف اتحرك كنت فاكر نفسي بحلم لحد ما لمستني ايد من ضهري و كان جدي و قالي
مالك بتبص على ايه كدا و مش سامعني.. في واحدة حلوة معدية ولا ايه!
بصراحة مكنتش عارف اقول لجدي على اللي شوفته ولا لاء بس قولت ياض يمكن تهيأت و قولت لجدي
لاء مفيش أنا سرحت كدا مع أغاني الست
أغاني ايه دا انت شايل السماعة من ودنك
ملقتش رد على كلام جدي و حبيت اغير السيرة و قولتله
انت ايه اللي مصحيك دلوقتي
ما اصحى عادي هو احنا في الفجر يبني دي الساعة ٩
انتو مش بتناموا هنا بدري برضه يا جدي
انت بقا جاي من القاهرة و فاكر أن الأرياف زي زمان الناس اه مش موجودة في الشارع بس صاحية في بيوتها
قولي يا جدي هي الأرض دي بتاعت مين!
بتسأل ليه!
لاء عادي فضول مش اكتر
فضول اممممم ماشي يا سيدي... الأرض دي بتاعت الحاج عبد الصمد
الله يرحمه
و مين اللي بيرعاها من بعده
ابنه هلال
و على كدا ابنه هلال دا مش ناوي يحصد الأرض مش خلاص 
الأرض نبتت
لا لسة مكملتش و متركزش مع الأراضي عشان هي عاملة زي المرايات الي موجودة في كل بيت و غلط تبص فيها بعد نص بليل كتير يلا انا هدخل انام عشان اعرف اصحى لأذان الفجر
سابني جدي في حيرة و استغراب من كلامه يعني ايه النظر للأراضي الزراعية عامل زي المراية اللي في بيتنا ! مخدتش على كلامه و قفلت البلكونة و دخلت الغرفة اللي بنام فيها لما باجي عند جدي
اصل انا نسيت اقولك انا محامي و باجي هنا اصفي زهني من دوشة القاهرة و الزحمة اللي فيها و دائما بعمل دا كل لما يبقى معايا قضية كبيرة و عايزة مكان هادي عشان اقدر افكر فيها و احلها باخد يومين إجازة و اجي اقعد مع جدي في البلد وبطلع بالحل بعد ما بصيت على ورق القضية شوية دخلت أوضتي و نمت!!
وبعد مدة صحيت على ايد بتخبط في جسمي جامد اوي قمت مفزوع لاقيت شخص واقف ماسك كشاف بإضاءة خفيف لكن وشه مش ظاهر و بيقولي 
قوم معايا عشان نشوف اللي بيحصل في الأرض دي!
انت مين !
أنا جدك يا مصطفى
دعكت عيني جامد عشان أتأكد من الشخص اللي واقف دا لاحظت تفاصيل وقفته وجسمه!! هو جدي فعلا لكن مشوفتش شكله قمت و مشيت وراه لحد باب البيت و خرجنا و اتجهنا ناحية الأرض الخاصة بالحاج 
عبد الصمد معرفش جدي وخدني هناك ليه في وقت زي دا!
فضلت ماشي وراه زي الاهبل من غير ما اعرف احنا بنعمل ايه ! 
دخل جدي الأرض وسط الزرع و دخلت وراه لكن من ساعة ما دخلت و انا مش شايفه اختفى مني فضلت انده عليه
يا جدي عثمان..... يا جدي عثمان!!
مفيش رد بس في حركة في الزرع و الأصوات اللي بتحصل كفيلة أنها تخوفك و صوت الغربان اللي طاير في السماء يرعبك اكتر انا كنت فاكر الحركة و اصوات الخطوات دي اللي بيعملها جدي فضل الزرع يتحرك كتير و الحركة كل مدى بتقرب مني لحد ما خرج شيء غريب و وقف قدامي!!
انا من بشاعة المنظر و شكله المخيف و القامة بتاعت جسمه مقدرتش ابصله كتير و لفيت وشي و جريت... جريت كتير و انا حاسس انه بيجري ورايا كنت بنهج و بنده على جدي بس صوتي واطي فضلت